صيام الحامل
صيام الحامل هل صح ام خطأ
سؤال بيخطر في بال كل أم حامل خصوصاً لو كان أول حمل ليها ينفع اصوم ولا هيأثر على صحة البيبي!
تعددت الأقاويل في الموضوع ده و كل حالة مختلفة على حسب ظروف حملها وصحتها الافضل انك تستشيري الدكتور الخاص بيكي.
بس احنا بنطمنك و بنقولك ينفع تصومي عادي مفيش أي خطر عليكي ولا على البيبي بس بشرط تكون صحتك كويسة و معندكيش اي امراض بس مع الالتزام بإرشادات، ومتابعة دكتورك لو حاسة بأي مشكلة
امتى ينفع تصومي في رمضان؟
ينفع تصومي لو انتي
- في المرحلة الاولى في الحمل ” أول 3 شهور” لو كانت صحتك سليمه و معندكيش أي مشاكل في الوحم بالرغم من أنه غير مستحب الصيام في الفترة دي عشان الحمل بيكون مش ثابت.
- حامل في المرحلة التانية من الحمل “الشهر رابع و خامس و سادس” عشان الشهور دي أكتر شهور استقرار في فترة الحمل كلها، و في الغالب دي أحسن فترة مناسبة للصيام.
- في المرحلة الأخيرة في الحمل ” اخر 3 شهور” لو في أي مشاكل صحية فيهم الاحسن انك تفطري و الأحسن طبعاً استشارت الدكتور
لو الدكتور طمنك و قررتي تصومي هنقولك معلومة عن الصيام انه بيخلصك من اكتئاب الحمل و بيحسن من حالتك النفسية و يعدل مزاجك عشان بتحسي بالطمأنينة والارتياح في الجهاز الهضمي
امتي لازم تفطري ؟
في حالات معينة الدكاترة بتنصح بعدم الصيام عشان تحافظي علي صحتك وصحة البيبي زي
1. انخفاض شديد في ضغط الدم
ومن أعراضه:
- عدم التركيز.
- دوخة.
2. انخفاض في سكر الدم
ومن أعراضه:
- صداع شديد جداً.
- هبوط.
- مش قادرة تعملي أي مجهود.
3. عندك جفاف ممكن في الحالة دي يحصل ضرر في نمو البيبي.
4. مشاكل الوحم في الثلاثة أشهر الأولي من الحمل.
ومن اعراضه:
- الغثيان.
- القيء.
5. أي أمراض عضوية مثل
- سكر.
- ضغط.
- فقر دم.
- نزيف متكرر.
- أنيميا.
6.لو حامل في توأم، فأنتي محتاجة تغذية و أهتمام زيادة الاحسن انك متصوميش.
نصائح ليكي لو صايمة خلال شهر رمضان
عشان فترة الصيام تعدي بسلام و امان أتبعي بعض النصائح عشان تتجنبي حصول أي مشاكل ليكي و للبيبي
- لازم وجبة الفطار تكون غنية بالسعرات الحرارية، فيها كل المجموعات الغذائية من بروتين وكربوهيدرات ودهون وغيرها عشان تساعدك على الإحساس بالشبع في نهار رمضان و الطاقة لممارسة حياتك اليوميه بدون تعب.
- تناول الكثير من الأطعمة الغنية بالكالسيوم زي الألبان والبيض وغيرها، والأطعمة الغنية بالبروتين والحديد.
- شرب 2 لتر ماء علي الأقل والسوايل عموماً يومياً، عشان تعوضي الفقد خلال الصيام و تمنعي حدوث جفاف.
- أهتمي بوجبة السحور وأخرى معادها على قد ما تقدري عشان جسمك يقدر يخزن الأكل لفترة طويلة و هيساعدك علي عدم الشعور بالجوع في فترة الصيام.
- الاحسن تقسمي الوجبات إلى فطار وعشاء وسحور يكون فيها جميع العناصر الغذائية وابعدي عن واجبات السعرات العالية و دهون كتير.
- طبعاً الراحة خلال فترة الصيام و عشان تقللي من فقدان السوائل و السعرات الحرارية.
- تناول الكثير من الفاكهة و الخضروات عشان فيها كميات كبيره من الأملاح والفيتامينات.
- الاحسن أنك متشربيش كافيين كتير في فترة الحمل و خصوصاً في الصيام.
- بلاش مشروبات غازية و سكريات كتير.
- لو حسيتي بأي أعراض لازم تتصلي بالدكتور الخاص بيكي.
في النهاية نصيحتنا ليكي كل حالة تختلف عن التانية في تفاصيلها وطبيعتها وظروف الحالة الصحية للأم لذلك استشيري الدكتور الخاص بيكي قبل ما تاخدي اي قرار عشان نضمن سلامتك وسلامة البيبي
